नर्वेका आधारभूत विद्यालयमा जेनेरेटिभ एआई प्रतिबन्ध, कक्षाकोठामा पुस्तकको प्रयोग बढाउने

काठमाडौं । नर्वेले आधारभूत तहका विद्यार्थीहरूका लागि जेनेरेटिभ एआई उपकरणहरूको प्रयोगमा लगभग पूर्ण प्रतिबन्ध लगाएको छ । साथै, सिकाइमा नकारात्मक प्रभाव पर्न नदिन निम्न माध्यमिक र माध्यमिक तहका बालबालिकाको शिक्षामा समेत यसको प्रयोगलाई सीमित गरिएको नर्वेका प्रधानमन्त्री जोनस गार स्टोरेले बताएका छन् ।

“विद्यालयमा सबैभन्दा महत्त्वपूर्ण कुरा भनेको हाम्रा बालबालिकाले पढ्न, लेख्न र गणित गर्न सिक्नु हो,” स्टोरेले भने । गत शुक्रबार जारी गरिएका नयाँ मापदण्डहरू आगामी अगस्टको अन्त्यमा सुरु हुने नयाँ शैक्षिक वर्षदेखि लागु गरिने भएको छ । नर्वे सरकारका अनुसार ६ देखि १३ वर्ष उमेरका अर्थात् कक्षा १ देखि ७ सम्मका विद्यार्थीहरूले सामान्य रूपमा एआई प्रयोग गर्न पाउने छैनन् । तर १४ देखि १६ वर्ष उमेरका निम्न माध्यमिक तहका विद्यार्थीहरूले भने शिक्षकको निगरानीमा सावधानीपूर्वक एआई उपकरण प्रयोग गर्न सक्नेछन् ।