बाढीपीडितको पहिचानका लागि नेपाललाई अमेरिकाले थप १० लाख डलर सहयोग गर्ने

काठमाडौं । नेपालमा आएको बाढीबाट प्रभावित नागरिकप्रति गहिरो समवेदना व्यक्त गर्दै अमेरिकाले बाढीपीडितको पहिचान तथा उद्धार–पुनःस्थापना कार्यमा थप सहयोग गर्ने प्रतिबद्धता जनाएको छ । अमेरिकी विदेश मन्त्रालयअन्तर्गतको अन्तर्राष्ट्रिय लागूऔषध तथा कानुन कार्यान्वयन मामिला ब्युरोले बाढीबाट मृत्यु भएका तथा बेपत्ता व्यक्तिको पहिचानका लागि नेपाल प्रहरीलाई १० लाख अमेरिकी डलर बराबरको न्यायिक तथा फरेन्सिक सहयोग उपलब्ध गराउने भएको हो ।

अमेरिकी विदेश मन्त्रालयका अनुसार उक्त रकमबाट विशेषगरी डीएनए परीक्षणका लागि आवश्यक सामग्री तथा अन्य फरेन्सिक उपकरण उपलब्ध गराइनेछ। बाढीपछि नेपालमा पीडितको पहिचानका लागि आवश्यक पर्ने प्राथमिकताका क्षेत्रमा नेपाल प्रहरीसँग समन्वय गरेर सहयोग परिचालन गरिने अमेरिकाले जनाएको छ। यससँगै बाढीपछि अमेरिकाले नेपाललाई उपलब्ध गराएको मानवीय, स्वास्थ्य तथा फरेन्सिक सहयोगको कुल रकम ५० लाख अमेरिकी डलरभन्दा बढी पुगेको छ।