मलेसिया रोजगारी विवादमा सरकारको कूटनीतिक र प्रशासनिक पहल, २५ मुख्य संस्थामाथि छानबिन

काठमाडौँ । मलेसियामा नेपाली श्रमिक पठाउने प्रक्रियामा देखिएको अवरोध समाधानका लागि सरकारले कूटनीतिक तथा प्रशासनिक तहबाट पहल भइरहेको जनाएको छ। मलेसियाको विदेशी श्रमिक केन्द्रीकृत व्यवस्थापन प्रणाली (एफडब्लूसीएमएस) मा नेपाली वैदेशिक रोजगार व्यवसायीको आबद्धतासम्बन्धी समस्या देखिएपछि सरकारको भूमिकामाथि प्रश्न उठिरहेका बेला युवा, श्रम तथा रोजगार मन्त्रालयले दुई देशबीचको सरकारी संयन्त्रमार्फत समस्या समाधानको प्रयास भइरहेको स्पष्ट पारेको हो ।

मन्त्रालयले शनिबार साँझ जारी गरेको प्रेस नोटमा मलेसिया सरकारसँग नेपाली श्रमिक पठाउने प्रक्रियालाई नेपाल–मलेसिया श्रम सम्झौताअनुसार व्यवस्थित गर्न आग्रह भइरहेको जनाएको छ। श्रमिक आपूर्तिको प्रक्रियालाई पारदर्शी, व्यवस्थित, प्रतिस्पर्धात्मक र निर्बाध बनाउने सरकारको प्रतिबद्धता रहेको मन्त्रालयको भनाइ छ।