चितवनमा ५० हेक्टर वन क्षेत्रमा ‘टाइगर सेन्चुरी’ बनाइँदै

चितवन । समस्याग्रस्त बाघको व्यवस्थापनसँगै पर्यापर्यटन प्रवर्द्धन गर्ने उद्देश्यले चितवनमा ‘टाइगर सेन्चुरी’ निर्माणको तयारी थालिएको छ। चितवन राष्ट्रिय निकुञ्जको मध्यवर्ती क्षेत्रमा पर्ने देवनगरमा हाल दुई समस्याग्रस्त बाघ राखिएको स्थानलाई विस्तार गरी २० वटासम्म बाघ राख्न सक्ने संरचना बनाउन लागिएको हो।

चालु आर्थिक वर्षदेखि निर्माण सुरु गर्न सरकारले पाँच करोड रुपैयाँ बजेट विनियोजन गरेको छ। राष्ट्रिय निकुञ्ज तथा वन्यजन्तु संरक्षण विभागका प्रवक्ता डा। हरिभद्र आचार्यका अनुसार हाल सञ्चालनमा रहेको होल्डिङ सेन्टरसहित तीन तहका संरचना निर्माण गरिनेछन्।