तुइलखोलामा पहिरोको दीर्घकालीन समाधानका लागि विशेष प्राविधिक उपाय अपनाइँदै

काठमाडौँ। नारायणगढ–मुग्लिन सडकखण्डअन्तर्गत तुइलखोलामा वर्षैपिच्छे खस्ने पहिरोको स्थायी समाधानका लागि विशेष प्राविधिक उपाय अपनाइएको छ। वर्षा र हिउँद दुवै समयमा पहिरो खटने समस्या भएपछि सडक डिभिजन भरतपुरले भिरको स्लोप बनाएर ‘नेलिङ’ र ‘होरिजोन्टल ड्रेन’ प्रविधि प्रयोग गर्न लागेको हो।

सडक डिभिजनका प्रमुख इञ्जिनियर नारायणप्रसाद लामिछानेका अनुसार हाल तुइलखोलामा माथिका ठूला ढुङ्गा काटेर पन्छाउने काम भइरहेको छ। ठूला ढुङ्गा पन्छाएपछि जनशक्ति बढाएर स्लोप निर्माण, २डी/३डी डाइमेन्सनल नेट र बायोइन्जिनियरिङसहित नेलिङको काम एक महिनाभित्र थालिनेछ। साथै, रसाएको पानीले भूगोल कमजोर नबनाउन तेर्सो निकास (होरिजोन्टल ड्रेन) पनि व्यवस्था गरिनेछ।