जनमुखी शासनको ‘असाइनमेन्ट’

माओवादी द्वन्द्वले पश्चिम नेपाललाई निकै पिरोलेको समयमा म सानै थिएँ। हाम्रो गाउँघरतिर द्वन्द्वको त्रासदी र परिवर्तनको चाहना एकसाथ सलबलाएको थियो। १० वर्षसम्म चलेको सशस्त्र युद्धको अन्त्य र राजाको निरंकुश शासन ढल्दै गर्दा हामी पनि एउटा नयाँ युगतर्फ अर्थात् लोकतान्त्रिक गणतन्त्रमा हुर्किंदै थियौँ।

जति हुर्किंदै गयौँ, त्यति लोकतान्त्रिक गणतन्त्रका मूल्य-मान्यताबारे थाहा पाउँदै गयौँ। कक्षा १० सम्म टीकापुरमा पढेर पछि थप अध्ययनका लागि म काठमाडौँ आएँ। यहाँ आइसकेपछि राजनीतिक चेतना र नागरिक अधिकारबीच भइरहने बहसमा पुग्दा गणतन्त्रबारे मेरो दृष्टिकोण अझ फराकिलो बन्यो।