भिमादमा राष्ट्रिय परिचयपत्र स्टेशन जडान सुरु

तनहुँको भिमाद नगरपालिकास्थित भिमाद बजारमा राष्ट्रिय परिचयपत्र विवरण दर्ता स्टेशन सञ्चालनका लागि आवश्यक सामग्री जडानको काम सोमबारदेखि सुरु भएको छ । स्टेशन सञ्चालनमा आएपछि जिल्लाको पश्चिमी तथा दक्षिणी भेगका नागरिकलाई राष्ट्रिय परिचयपत्र बनाउन सदरमुकाम दमौली आउनुपर्ने बाध्यता नहुने भएको छ ।

जिल्ला प्रशासन कार्यालय तनहुँले भिमाद बजारमा दुई वटा विवरण दर्ता स्टेशन स्थापना गर्न लागेको हो । स्टेशन सञ्चालनका लागि आवश्यक उपकरण तथा सामग्री जडानको काम सुरु भएसँगै सेवा सञ्चालनको तयारी अन्तिम चरणमा पुगेको छ । प्रमुख जिल्ला अधिकारी शिवलाल तिवारीका अनुसार भिमादमा स्टेशन सञ्चालन भएपछि भिमाद नगरपालिका, घिरिङ गाउँपालिका, ऋषिङ गाउँपालिका, शुक्लागण्डकी नगरपालिका, म्याग्दे गाउँपालिका नागरिकले स्थानीयस्तरबाटै राष्ट्रिय परिचयपत्रसम्बन्धी सेवा लिन सक्नेछन् । “भिमादमा स्टेशन राख्ने काम अघि बढेको छ । आजदेखि आवश्यक सामग्री जडान सुरु भएको छ,” प्रमुख जिल्ला अधिकारी तिवारीले भन्नुभयो, “यसबाट पश्चिमी तथा दक्षिणी क्षेत्रका नागरिकलाई राष्ट्रिय परिचयपत्र बनाउन दमौली आउनुपर्ने बाध्यता कम हुनेछ ।”