रास्वपा पुरानै ढर्रामा हिँडे पतन निश्चित- महेन्द्र शाही

काठमाडौँ । नेकपाका नेता एवं सांसद महेन्द्र शाहीले मुलुक गम्भीर सङ्कटमा परेका बेला राष्ट्रियताको रक्षा पहिलो प्राथमिकता हुनुपर्ने बताएका छन् । राष्ट्रियता नै जोगाउन नसकिए विकास, पूर्वाधार, सामाजिक न्याय र सुशासनका कुराहरू सहायक विषय मात्र बनेर जाने उनले बताए ।

रिपोर्टस क्लबमा आज आयोजित एक कार्यक्रमलाई सम्बोधन गर्दै उनले देशको वर्तमान अवस्था र राजनीतिक परिदृश्यबारे आफ्ना धारणा राख्दै नेपालको भूराजनीतिक संवेदनशीलतालाई बुझेर अघि बढ्नुपर्ने बताए । ‘लामो सङ्घर्ष र बलिदानीबाट आजका दिनसम्म हामीले राष्ट्रियता जोगाएका छौँ । यदि फेरि देशमा कुनै किसिमको सङ्कट आयो भने सम्पूर्ण नागरिकले आफ्नो दायित्व पूरा गर्नैपर्छ,’ उनले भने ।