मनोनयन पूर्व घोषणा गरिनुपर्ने देश र जनता लक्षित चुनावी घोषणापत्रको कल्पना

………………………………………………..

पूर्वतिरको यात्रा तय गरिंदा बरमुजियाको पेंडाको याद आईहाल्छ तर कुन चांहि असली हो र कुन चांहि नक्कली पेंडा हो भन्ने कुरामा नखोजेसम्म हामी बिच अन्यौलता कायम रहिरहन्छ, त्यहां त पसलैपिच्छे उही बाजेको पेंडा, असली बाजेको पेंडा, सक्कली बाजेको पेंडा यता जस्ता थुप्रै किसिमबाट आ-आफ्नै स्वार्थ अनुकुल भ्रमपूर्ण प्रचार प्रसार भएजस्तै आगामी फाल्गुण २१ मा हुन गईरहेको प्रतिनिधि सभा सदस्य निर्वाचनमा पुराना र नयां दलहरु एवं दलहरुका उम्मेदवारहरुले देश र जनताको हितको लागि आफुहरु अत्यन्त प्रभावशाली सिद्ध पुरुष भएको र प्रतिद्वन्द्वीहरु कमजोर भएको लोकप्रिय नाराहरु र मिठा मिठा सपनाहरु बांड्न तल्लीन रहंदै आएका छन् । केवल यहां आमनागरिकहरु रणभुल्लमा परिरहेका छन् , कुन दलका राम्रो एवं सक्षम उम्मेदवारलाई विश्वास गरी मतदान गर्ने भनेर । यहां चुनाव केन्द्रित स्टण्टबाज र अल्पकालीन सोचकासाथ देवत्वकरण गरिएका पात्रहरुबाट आएको जनलहरमा बुझेर वा नबुझेर पछि पछि लाग्ने प्रवृत्ति हावी भईरहेको वर्तमान अवस्थासम्म पनि यकिन के हो भ्याउ नै नपाई अन्घाधुन्ध तरिकाले आफ्नो कान छ कि छैन छाम्नै बिर्सिएर दौडिईरहेको जनमानस पनि देखिन्छ।