स्रोतको चापमा मध्यम वर्ग रिझाउने बजेट

सरकारी कर्मचारी, मध्यम वर्गलाई खुसी पार्ने गरी सरकारले राजस्वको स्रोतबिना ऋण बढ्ने गरी ठुलो आकारको बजेट ल्याएको छ। कर्मचारीको तलब वृद्धि, मध्यम आम्दानी भएकाहरूको आयकर कटौती, निजी क्षेत्र तथा लगानीकर्तालाई प्रोत्साहन गर्ने गरी आगामी आर्थिक वर्ष २०८३/८४ लागि बजेट ल्याएको छ। मध्यम वर्गलाई राहत दिए पनि भुइँ मान्छे अर्थात् न्यून आय भएका श्रमिक वर्गका लागि बजेटले सम्बोधन गर्न सकेको छैन। यद्यपि बजेटले प्रशासनिक सुधार, कर प्रणलीलगायतका क्षेत्रमा नीतिगत परिवर्तन भने गरेको छ।

करिब दुई तिहाइ जनमतको सरकारका अर्थमन्त्री डा. स्वर्णिम वाग्लेले राजस्व स्रोतमा महत्त्वाकांक्षी लक्ष्य र ऋण लिने गरी आगामी आर्थिक वर्षका लागि कुल २१ खर्ब २४ अर्ब ३४ करोड रुपैयाँको बजेट ल्याएका छन्। अर्थमन्त्री वाग्लेले बजेटमार्फत अर्थतन्त्रमा नीतिगत सुधार गरी फरक खालको ‘डिपार्चर’ गर्ने संकेत गरेका छन्। करिब साढे ६ अर्ब रुपैयाँ ऋण लिने गरी बजेट तर्जुमा गरिएको छ । राजस्व प्रणालीमा केही डिपार्चर दिए पनि बजेटको पूर्ण कार्यान्वयन भए ऋणको भार भने बढ्ने गरी बजेट आएको छ। बजेटले निजी क्षेत्र भने उत्साहित छ।