एसभीपी प्रक्रियालाई तत्कालका लागि स्थगित गर्न मन्त्री यादवको आग्रह

काठमाडौँ । युवा, श्रम तथा रोजगारमन्त्री रामजी यादवसँग नेपालका लागि साउदी अरबका राजदूत फहद मोहम्मद ए. मिएखरले शिष्टाचार भेट गरेका छन्। मन्त्रालयमा भएको उक्त भेटका क्रममा द्विपक्षीय श्रम सहकार्य र नेपाली श्रमिकका समसामयिक समस्याका विषयमा छलफल भएको छ।

भेटका क्रममा मन्त्री यादवले साउदी अरबले कार्यान्वयन गर्न लागेको नेपाली श्रमिकहरूको सीप प्रमाणीकरण (एसभीपी) प्रक्रियालाई तत्कालका लागि स्थगित गर्न विशेष आग्रह गरे। उक्त नयाँ प्रक्रियाका कारण साउदी जान चाहने नेपाली श्रमिकहरूको भिसा प्रक्रिया प्रभावित भइरहेकाले यसलाई यथावत् रूपमा अगाडि बढाउने वातावरण मिलाइदिन उनले राजदूतसँग अनुरोध गरे।