बीस स्रष्टासँगको अन्तर्वार्तामा आधारित ‘प्राज्ञिक संलाप’ पुस्तकमाथि परिचर्चा

काठमाडौं- नेपाली साहित्यका विभिन्न विधामा स्थापित २० जना स्रष्टासँग गरिएको अन्तर्वार्तामा आधारित ‘प्राज्ञिक संलाप’ पुस्तकमाथि आज परिचर्चा गरिएको छ । आज नागार्जुन वाङ्यमय प्रतिष्ठानले परिचर्चा कार्यक्रम आयोजना गरेको हो ।

शुभप्रभात काव्यगोष्ठीसमेतको उक्त कार्यक्रममा साहित्यकार एवं अन्तर्वार्ताकार दील पौडेलद्वारा सङ्कलित उक्त पुस्तकमा विभिन्न विचारधारा र विधाका स्रष्टाहरूसँगको साहित्यिक प्रश्नोत्तर समावेश गरिएको जानकारी दिइयो । दुई सय ८४ पृष्ठको कृतिमा प्रा डा जीवेन्द्रदेव गिरी, प्रा डा कृष्णहरि बराल, प्रा डा कृष्णप्रसाद दाहाल, प्रा डा गङ्गाप्रसाद अधिकारी, डा अमर गिरी, प्रा डा लक्ष्मणप्रसाद गौतम, सहप्रा यज्ञेश्वर निरौला, डा छायादत्त न्यौपाने, प्रा डा रामप्रसाद ज्ञवालीसँगको अन्तर्वार्ता समावेश छन् ।