राष्ट्रिय हितलाई केन्द्रबिन्दुमा राखेर परराष्ट्र नीति सञ्चालन गर्न सरकार प्रतिबद्ध छः परराष्ट्रमन्त्री खनाल

काठमाडौं । परराष्ट्रमन्त्री शिशिर खनालले नेपालको सार्वभौमसत्ता, भौगोलिक अखण्डता, राष्ट्रिय सुरक्षा र दीर्घकालीन राष्ट्रिय हितलाई केन्द्रमा राखेर परराष्ट्र नीति सञ्चालन गर्न सरकार पूर्ण प्रतिबद्ध रहेको बताएका छन् ।

प्रतिनिधिसभाको मंगलबारको बैठकमा सांसद सीता थपलियाले भारत भ्रमणका क्रममा आफूले ‘वर्तमान सरकारसँग पुरानो ब्यागेज नभएको’ अभिव्यक्ति दिएको सन्दर्भमा प्रश्न गरेकी थिइन् । उनले विगतका सरकारका कुन–कुन निर्णयलाई ‘ब्यागेज’ भनिएको हो, लिपुलेक, कालापानी र लिम्पियाधुरा समेटिएको नेपालको नक्सालाई संविधानमा समावेश गर्ने निर्णय पनि त्यसैभित्र पर्छ कि पर्दैन तथा विगतका परराष्ट्र नीतिमा के–कस्ता कमजोरी थिए भन्नेबारे स्पष्टीकरण मागेकी थिइन् ।