समाचार हटाउन अदालतले दिएको आदेशप्रति पत्रकार महासंघको गम्भीर ध्यानाकर्षण

अदालतले २०८३ जेठ २५ मा भएको अन्तरकालीन आदेशलाई निरन्तरता दिँदै निवेदनको अन्तिम टुङ्गो नलागेसम्म ‘बिजनेश भेन्चर मिडिया प्रालि’द्वारा सञ्चालित सञ्चारमाध्यम तथा अनलाइनमा ती समाचार सामग्री प्रकाशन र प्रसारण नगर्न तथा भएका सामग्रीहरू तुरुन्तै हटाउन आदेश दिएको थियो ।

महासंघले यो आदेश पत्रकार आचारसंहिता २०७३ को बुँदा ५ (८) मा रहेको ‘अनलाइन सञ्चारमाध्यमबाट समाचार हटाउनु (पोष्ट डिलिट) हुँदैन’ भन्ने प्रावधानसँग मेल नखाएको स्पष्ट पारेको छ । साथै, समाचारको सत्यता परीक्षण गर्ने कानुनी क्षेत्राधिकार प्रेस काउन्सिल नेपालको भए पनि अदालतको आदेशले त्यससँग तादाम्यता नमिलाएको महासंघको ठहर छ ।