भोटेकोशी बाढीको त्रास कायमै, वर्षा र नदी थुनिएर बनेको ताल फुट्ने जोखिम

काठमाडौं । भोटेकोशी बाढीको त्रास कायमै रहेका बेला प्रभावित क्षेत्रमा वर्षा र माथिल्लो क्षेत्रमा नदी थुनिएर बनेको ताल फुट्ने जोखिम थपिएको छ। जल तथा मौसम पूर्वानुमान महाशाखाले शनिबार भोटेकोशी प्रभावित क्षेत्रमा मध्यमदेखि भारी वर्षाको सम्भावना रहेको जनाएको छ भने बाढी पूर्वानुमान महाशाखाले नदी थुनिएर बनेको तालको आकार बढ्दै गएकाले त्यसले फेरि तल्लो तटीय क्षेत्रमा आकस्मिक बाढी ल्याउन सक्ने चेतावनी दिएको छ।

जल तथा मौसम पूर्वानुमान महाशाखाका मौसमविद् हरिप्रसाद दाहालका अनुसार रसुवाको भोटेकोशी बाढी प्रभावित क्षेत्रमा शनिबार अधिकांश स्थानमा मध्यमसम्म वर्षा हुने सम्भावना छ। एक–दुई स्थानमा भारी वर्षा हुन सक्ने भएकाले खोज तथा उद्धारमा समेत असर पर्न सक्ने उनले बताए।