उदयपुरमा बाढी–पहिरोको क्षति, विद्यालय जोखिममा र सडक अवरुद्ध

मंगलबार रातिदेखि बुधबार बिहानसम्म परेको अविरल वर्षापछि उदयपुरका विभिन्न स्थानमा बाढी र पहिरोले भौतिक क्षति पुर्‍याएको छ। पहिरोका कारण सडक अवरुद्ध हुनुका साथै खेतबारीमा क्षति पुगेको छ भने त्रियुगा नगरपालिका–१६ जालपा चिलाउनेस्थित भोर्ले माध्यमिक विद्यालय उच्च जोखिममा परेको छ।

विद्यालयको मुख्य प्रवेशद्वार नजिकै करिब १५ मिटर लामो पहिरो गएपछि पक्की भवन तथा करिब ३ सय विद्यार्थीको सुरक्षामा जोखिम बढेको वडाध्यक्ष मानबहादुर राईले बताए। स्थानीय जनप्रतिनिधि र प्राविधिक टोलीले स्थलगत निरीक्षण गरी मर्मत, पहिरो नियन्त्रण र राहतका लागि सम्बन्धित निकायसँग आग्रह गरेका छन्।