मोटरसाइकल चेकजाँच गर्दा बरामद भयो स्रोत नखुलेको ५५ लाख रुपैयाँ

डोल्पा । जिल्लाको त्रिपुरा सुन्दरी नगरपालिका वडा नम्बर १ त्रिपुराकोट बजारस्थित भेरी करिडोर सडक खण्डबाट प्रहरीले स्रोत नखुलेको ५५ लाख १० हजार रुपैयाँसहित दुई जनालाई पक्राउ गरेको छ । जिल्ला प्रशासन कार्यालय डोल्पाका प्रतिनिधिको उपस्थितिमा खटिएको संयुक्त सुरक्षा टोलीले उनीहरूलाई नियन्त्रणमा लिएको हो ।

बुधबार जिल्ला प्रहरी कार्यालय डोल्पाबाट प्रहरी निरीक्षकको कमान्डमा ११ जना र सशस्त्र प्रहरी बल नेपाल नम्बर ४६ गुल्म हेडक्वार्टर डोल्पाबाट सशस्त्र प्रहरी निरीक्षकको कमान्डमा १० जना गरी खटिएको २१ जनाको संयुक्त टोलीले सो क्षेत्रमा चेकजाँच गरिरहेको थियो । त्यस क्रममा दुनैबाट छलतर्फ जाँदै गरेको भे १३ प ९२६५ नम्बरको मोटरसाइकललाई रोकेर चेकजाँच गर्दा सो परिमाणको रकम फेला परेको हो ।