पूँजीगत लाभकर विषयमा अर्थमन्त्रीले भने : फाइनल नै हो

१७ जेठ, काठमाडौं । बजेटको एक लाइनमै धितोपत्रको दोस्रो बजारमा तिरिने पूँजीगत लाभकर अन्तिम भनेर व्याख्या गरियो । यो बुँदाले पूँजी बजारबाट जतिसुकै रकम नाफा गरे पनि त्यसमा तिरिएको लाभकर अन्तिम भन्ने बुझाउँछ ।

यो व्याख्यालाई अझ प्रष्ट पार्ने आर्थिक विधेयकले भने वार्षिक ४० लाख रुपैयाँसम्मको पूँजीगत लाभकर अन्तिम हुने आशय गरेको छ । वार्षिक ४० लाखभन्दा बढी आम्दानी गर्नेले आय विवरण अनिवार्य बुझाउनुपर्ने व्यवस्था छ । अर्थमन्त्री डा. स्वर्णिम वाग्लेले बजेट सार्वजनिकपछि आयोजना गरेको पत्रकार सम्मेलनमा पनि यो विषयलाई सम्बोधन गर्न खोजे तर विधेयकअनुसार प्रष्ट पार्न सकेनन् ।