रारा ट्रेल रनमा जुम्लाको दबदबा, पुरुष–महिला दुवै उपाधि आफ्नै नाम

रारा ताल वरिपरि आयोजित छैटौँ रारा ट्रेल रन प्रतियोगितामा जुम्लाका खेलाडीहरूले प्रभावशाली प्रदर्शन गर्दै पुरुष र महिला दुवै विधाको उपाधि जितेका छन्। खेलकुद, पर्यटन प्रवर्द्धन र स्थानीय संस्कृतिको संगमका रूपमा स्थापित हुँदै गएको यस प्रतियोगिताले यस वर्ष पनि कर्णालीको खेल प्रतिभा उजागर गरेको छ।

१६ किलोमिटर दूरीको मुख्य ट्रेल रनमा पुरुषतर्फ जुम्लाका दलबहादुर कुँवर पहिलो भए। उनले निर्धारित दूरी १ घण्टा १५ मिनेटमा पूरा गर्दै उपाधि हात पारे। दोस्रो स्थान जुम्लाकै राज बुढाले हासिल गरे भने तेस्रो स्थान मुगुका अक्कल बढुवालले प्राप्त गरे। पुरुषतर्फको प्रतिस्पर्धामा जुम्लाका धावकहरूको निरन्तर अग्रता देखिएको थियो।