मकवानपुरगढी गाउँपालिकाले ल्यायो ७२ करोड ७५ लाखको बजेट

हेटौँडा । मकवानपुरगढी गाउँपालिकाले आगामी आर्थिक वर्ष २०८३/८४ का लागि ७२ करोड ७५ लाख २३ हजार रुपैयाँको बजेट सार्वजनिक गरेको छ । मकवानपुरगढीले आगामी आर्थिक वर्षको नीति कार्यक्रम कार्यान्वयन गर्न बुधाबार बसेको गाउँसभामा उपाध्यक्ष मानकुमारी पाख्रिन नेपालीले उक्त बजेट प्रस्तुत गरेकी हुन् ।

प्रस्तुत बजेटमध्ये चालु खर्च तर्फ ४३ करोड ९० लाख २३ हजार रुपैयाँ (६०.३५ प्रतिशत) र पुँजीगत खर्चतर्फ २८ करोड ८५ लाख रुपैयाँ (३९.६५ प्रतिशत) विनियोजन गरिएको छ । उक्त बजेटको खर्च व्यहोर्ने स्रोत तर्फ सङ्घीय सरकारबाट वित्तीय समानीकरण अनुदान १० करोड ९० लाख रुपैयाँ, राजस्व बाँडफाँडबाट २२ करोड १९ लाख रुपैयाँ तथा आन्तरिक आय र गत वर्षको मौज्दात गरी ८ करोड ८३ लाख रुपैयाँ प्राप्त हुने अनुमान गरिएको छ ।