गैरबैंकिङ सम्पत्ति भाडामा लगाउने व्यवस्था गर्न बैंकहरूको माग

१० असार, काठमाडौं । नेपाल बैंकर संघले बैंकहरूको गैरबैंकिङ सम्पत्तिलाई भाडामा लगाउन पाउनुपर्ने व्यवस्था गर्न राष्ट्र बैंकसँग माग गरेको छ । संघले आगामी आर्थिक वर्षको मौद्रिक नीतिलाई सुझाव दिने क्रममा गैरबैंकिङ सम्पत्ति भाडामा लगाउने कानुनी व्यवस्था गर्न माग गरेको हो ।

संघले सुरक्षणपत्र नगदमा परिणत गर्ने व्यवस्था नभएकोले दोस्रो बजार स्थापनाका लागि आवश्यक पहल गरिनुपर्ने सुझाव केन्द्रीय बैंकलाई दिएको छ । बैंकहरूले गैरबैंकिङ सम्पत्तिलाई भाडामा लगाउन सक्ने कानुनी व्यवस्थाका लागि बैंक तथा वित्तीय संस्था सम्बन्धी ऐन संशोधनका लागि आवश्यक पहल केन्द्रीय बैंकले गरिदिनुपर्ने संघको सुझाव छ ।