उपमहानगरउन्मुख वीरेन्द्रनगरः फेरि मापदण्ड पूरा भएको दाबी, आधुनिक सहरको विकासमा जोड

सुर्खेत । एउटा पनि उपमहानगर नभएको प्रदेश हो कर्णाली । यहाँको प्रदेश राजधानी वीरेन्द्रनगरलाई उपमहानगरपालिका बनाइने भनिए पनि हालसम्म यस कार्यले मूर्तरूप भने पाउन सकेको छैन । तर वीरेन्द्रनगर नगरपालिकाले पछिल्लो आर्थिक वर्षहरूमा यही कुरा पटक–पटक दोहोर्‍याउने गरेको छ ।

२०७८ असारमा बसेको नवौँ नगरसभाले वीरेन्द्रनगरलाई उपमहानगरपालिका बनाउने एजेण्डा पारित गरेको थियो । उक्त निर्णय त्यही बेला केन्द्र सरकारको मन्त्रिपरिषदसम्म पुगेको थियो । २०७९ को चुनावपछि नगरप्रमुख बनेकी मोहनमाया ढकालले हरेक वर्षको नीति तथा कार्यक्रममा यही विषयलाई प्रमुखताका साथ समेट्ने गरेकी छन् ।