५५ प्रतिशत मात्रै रोपाइँ: धान उत्पादन घट्ने चिन्ता

समयमै पर्याप्त वर्षा नहुँदा यस वर्ष देशभर धान रोपाइँ अपेक्षाभन्दा सुस्त भएको छ। कृषि विभागका अनुसार असार सकिन लाग्दा मुलुकभर जम्मा ५४.५२ प्रतिशत धान रोपाइँ भएको छ। गत वर्ष यही अवधिमा ५९.२८ प्रतिशत रोपाइँ सम्पन्न भएको थियो। यस वर्ष पोहोरभन्दा करिब पाँच प्रतिशतले कम रोपाइँ भएको छ।

धान नेपालको प्रमुख खाद्यान्न बाली भएकाले समयमा रोपाइँ हुन नसके उत्पादनमा असर पर्ने चिन्ता बढेको छ। कृषि विभागका अधिकारी भने अहिले नै उत्पादन घट्ने निष्कर्षमा पुग्न नहुने बताउँछन्। अहिले वर्षा भएर धमाधम रोपाइँ भइरहेकाले उत्पादन घट्ने चिन्ता गर्न नहुने कृषि विभागका प्रवक्ता राजेन्द्र कोइरालाले बताए। ‘साउनको मध्यसम्म अधिकांश क्षेत्रमा रोपाइँ सम्पन्न हुने अपेक्षा गरिएको छ’, कोइरालाले भने, ‘आगामी ८–१० दिनमा रोपाइँले तीव्र गति लिन्छ।’