बिदा स्वीकृत नगराई ६० दिनभन्दा बढी सम्पर्कविहीन २३ सरकारी नर्स र डाक्टरसँग मन्त्रालयले माग्यो स्पष्टिकरण

काठमाडौं - स्वास्थ्य तथा जनसंख्या मन्त्रालयले बिदा स्वीकृत नगराई ६० दिनभन्दा बढी समयदेखि कार्यालयमा अनुपस्थित रहेका २३ जना सरकारी स्वास्थ्यकर्मीलाई सात दिनभित्र स्पष्टिकरण पेश गर्न निर्देशन दिएको छ।

मन्त्रालयले सार्वजनिक गरेको सूचनाअनुसार अनुपस्थित कर्मचारीहरूमा नर्स, मेडिकल अधिकृत, मेडिकल ल्याब टेक्निसियन, रेडियोलोजिस्ट, बायोमेडिकल इन्जिनियर तथा जनस्वास्थ्य अधिकृतलगायत रहेका छन्। उनीहरू वीर अस्पताल, कान्ति बाल अस्पताल, शुक्रराज ट्रपिकल तथा सरुवा रोग अस्पताल, राष्ट्रिय क्षयरोग नियन्त्रण केन्द्र र आयुर्वेद चिकित्सालय नरदेवीलगायतका स्वास्थ्य संस्थामा कार्यरत छन्।