महँगीले मार्‍यो

एमबीबीएसको तयारी गरिरहेका उत्सव पोखरेल तयारी कक्षा पढ्न दैनिक अनामनगरबाट पुतलीसडक धाउँछन्। यो दूरीमा सार्वजनिक गाडीको भाडा सामान्यतया २० रुपैयाँ रहेकामा विद्यार्थी परिचयपत्र देखाएपछि उनले १५ रुपैयाँ तिर्दा पुग्थ्यो। तर, अहिले २५ रुपैयाँ तिर्नुपरेको उनी बताउँछन्। भन्छन्, “इन्धनको मूल्य बढ्यो भनेर गाडीवालाले विद्यार्थी छुट पनि दिन छाडेका छन्। कहिलेकाहीँ त हिँडेरै आउजाउ गर्छु। भाडा वृद्धिले दिक्क बनाएको छ।”

अमेरिका-इजरायल र इरानबीच १६ फागुन २०८२ देखि सुरु भएको युद्ध अझै साम्य भएको छैन। इरानबाट तीन हजार ३०० किलोमिटरभन्दा बढी हवाई दूरीमा रहेको नेपालका विद्यार्थी उत्सवको यो युद्धसँग प्रत्यक्ष कुनै साइनो छैन। तर, उनले युद्धको असर दैनिक जीवनमै भोगिरहेका छन्। युद्धपछि पेट्रोलियम पदार्थको भाउ अचाक्ली बढेर सार्वजनिक यातायातको भाडादेखि उपभोग्य वस्तुसम्म महँगिँदा उनको खर्च ह्वात्तै बढेको छ।