केएमसीमा ६७ वर्षीय पुरुषको मस्तिष्कमा फुटेको 'एभीएम'को बिनाचिरफार सफल उपचार

काठमाडौं- काठमाडौं मेडिकल कलेज (केएमसी) मा ६७ वर्षीय एक पुरुषको मस्तिष्कको जटिल रक्तनलीसम्बन्धी रोग 'ब्रेन एभीएम' (आर्टेरियोभेनस मालफर्मेसन) को चिरफार नगरी न्युरोइन्टरभेन्सन प्रविधिबाट सफल उपचार गरेको छ। चिकित्सकहरूका अनुसार ६७ वर्षको उमेरमा फुटेको एभीएमको यस प्रविधिबाट सफल उपचार भएको नेपालकै सम्भवतः पहिलो घटना हो।

बाँकेका ६७ वर्षीय हरिप्रसाद कँडेल पहिलेदेखि नै दीर्घकालीन कलेजो रोगबाट पीडित थिए। अचानक बेहोस भएपछि परिवारले उनलाई तत्काल काठमाडौं मेडिकल कलेजको आकस्मिक कक्षमा पुर्‍याएको थियो। करिब तीन घण्टादेखि अचेत रहेका कँडेलको तत्काल सीटी स्क्यान गर्दा मस्तिष्कको असामान्य स्थानमा ठूलो रक्तस्राव (हेमाटोमा) देखियो।