स्वास्थ्य बिमा : सेवा कि केवल आश्वासन ?

नेपालमा स्वास्थ्य बिमा कार्यक्रम शुरु गर्दा राज्यले एउटा महत्वपूर्ण सामाजिक प्रतिबद्धता व्यक्त गरेको थियो– नागरिक आर्थिक अभावका कारण उपचारबाट वञ्चित हुनु नपरोस् । तर आज कार्यक्रम कार्यान्वयनको करिब एक दशक पुग्न लाग्दा स्वास्थ्य बिमाको मूल उद्देश्य नै संकटमा परेको देखिन्छ ।

स्वास्थ्य बिमा बोर्डले हालै देशभरका ३६४ अस्पताल तथा स्वास्थ्य संस्थालाई करिब २ अर्ब रुपियाँ भुक्तानी गरेको छ । यो कदम सकारात्मक भए पनि यसले स्वास्थ्य बिमा कार्यक्रमका गम्भीर संरचनागत समस्या समाधान गरेको छैन । वास्तविकता के हो भने, बिमा कार्ड बोकेर अस्पताल पुग्ने नागरिकले सेवा पाउने सुनिश्चितता अझै छैन ।