श्रम, भौतिक, सहरीको बजेट सिलिङ घट्यो, ऊर्जा र खानेपानी मन्त्रालयको बढ्यो

काठमाडौँ — आगामी आर्थिक वर्ष २०८२/८३ का लागि विकासे मन्त्रालयहरूमध्ये भौतिक पूर्वाधार र सहरी विकासको बजेट सीमा (सिलिङ) घटाइएको छ । तर विकासे मन्त्रालयअन्तर्गतकै ऊर्जा र खानेपानीको भने बढाइएको छ । राष्ट्रिय योजना आयोगका उपाध्यक्ष नेतृत्वको राष्ट्रिय स्रोत अनुमान समितिले गत फागुन पहिलो साता अर्थ मन्त्रालयमा पेस गरेको ‘राष्ट्रिय स्रोत अनुमान तथा खर्च सीमा निर्धारणसम्बन्धी प्रतिवेदन २०८१’ मा उल्लिखित मन्त्रालयमा बजेटको सीमा हेरफेर गरिएको हो ।

यस वर्ष सरकारले ३ खर्ब ५२ अर्ब पुँजीगत खर्च विनियोजन गरेकामा ८ महिनाको अवधिमा लक्ष्यको करिब २३.८७ प्रतिशत अर्थात् ८४ अर्ब ११ करोड रुपैयाँ मात्र खर्च भएको छ । यो सरकारको वार्षिक लक्ष्यको एक चौथाइ मात्र हो । सरकारले लक्ष्यअनुसार पुँजीगत खर्च गर्न नसकिरहेको बेला स्रोत अनुमान समितिले आगामी वर्षका लागि मुख्य विकासे मन्त्रालयको बजेट भारी कटौती गरेको हो ।