मधेस युनाइटेडको नयाँ लोगो सार्वजनिक

काठमाडौँ । एभरेस्ट महिला भलिबल लिग (इडब्लुभिएल) मा सहभागी टोली मधेस युनाइटेडले आफ्नो नयाँ लोगो सार्वजनिक गरेको छ। टिमले सार्वजनिक गरेको लोगोले खेल, संस्कृति र मधेशी गर्वलाई एउटै प्रतीकमा समेटेको जनाएको छ। हरियो रङको लोगोको केन्द्रमा भलिबल राखिएको छ, जसले टिमको प्रतिस्पर्धा, जोश र खेलभावनालाई प्रतिनिधित्व गर्छ। भलिबल वरिपरिका लहरहरूले गतिशीलता, ऊर्जा र तीव्रताको भाव प्रकट गर्छन्।

लोगोको माथिल्लो भागमा जानकी मन्दिरबाट प्रेरित मन्दिरको आकृति समावेश गरिएको छ, जुन मधेस क्षेत्रको सांस्कृतिक पहिचान र धार्मिक सम्पदाको प्रतीक हो। लोगोले मधेसको ऐतिहासिकता, सांस्कृतिक धरोहर र खेलकुदको भावनालाई एकसाथ प्रस्तुत गरेको टिमले जनाएको छ। मधेस युनाइटेडका अनुसार नयाँ लोगो खेलकुद र संस्कृतिको उत्कृष्ट संयोजन हो, जसले मधेसको समृद्ध सांस्कृतिक सम्पदा र महिला भलिबलको उदयशील प्रतिनिधित्वलाई समेटेको छ।