अशोक शेरचनको बयान: सञ्चालक समितिको मौखिक आदेशमा गुण एयरलाइन्सलाई कर्जा

काठमाडौं । प्रभु बैंकका प्रमुख कार्यकारी अधिकृत (सीईओ) अशोक शेरचनले २०७८ असोज ६ गते गुण एयरलाइन्सलाई १५ करोड रुपैयाँ कर्जा प्रवाह गर्दा ‘बोर्ड रेक्टिफिकेसन’ (सञ्चालक समितिबाट पछि अनुमोदन गर्ने) सर्तमा आफूले दस्तखत गरेको बयान दिएका छन् । उनले तत्काल सञ्चालक समितिको बैठक बस्न सम्भव नभएकाले सञ्चालक समितिको मौखिक आदेशअनुसार कर्जा स्वीकृत गरेको र पछि बसेको बैठकले त्यसलाई अनुमोदन गरिसकेको बयान दिएका हुन् ।

उनले यसरी कर्जा स्वीकृत गर्नु बैंकिङ क्षेत्रको प्रचलन नै रहेको जिकिर गरेका छन् । प्रभु म्यानेजमेन्टसँग भएका रेमिट्यान्स सम्झौताहरूमा आफ्नो दस्तखत रहेको स्वीकार गर्दै शेरचनले ‘प्रिफन्डिङ’ को व्यवस्था राष्ट्र बैंककै विनियमावली अनुसार भएको बताएका छन् । प्रभु म्यानेजमेन्टको २७ करोड रुपैयाँ ‘सेटलमेन्ट’ भइसकेको र सम्झौतामा स्पष्ट नखुलेका कारण सो रकममा ब्याज नलिएको बयान उनले दिएका छन् ।