‘वाका वाका’ को गर्जनदेखि ‘दाइ दाइ’ को नयाँ क्रेजसम्म !

विश्व फुटबलको महाकुम्भ र संगीतको दुनियाँ जब एक ठाउँमा उभिन्छन्, तब त्यहाँ एउटा यस्तो तरंग बहन्छ जसले सारा संसारलाई आफ्नो लयमा नचाउँछ । सन् २०१० को त्यो ऐतिहासिक क्षण सायदै कसैले भुल्न सक्छ । जब पहिलोपटक अफ्रिकी भूमिमा विश्वकपको बिगुल फुकिएको थियो । जोहानेसबर्गको रंगशाला रंगीन जर्सी, बाजागाजा र भुभुजेलाको कानै खाने गर्जनले थर्किएको बेला स्टेजमा एउटा यस्तो सुन्दरीको प्रवेश भयो । जसको एउटै कम्मरको झट्का र जादुमयी आवाजले अर्बौँ मानिसको ढड्कन रोकिदियो । ती थिइन्, ल्याटिन पप क्वीन शाकिरा र उनको त्यो सदाबहार गीत थियो “वाका वाका (डिस टाइम फोर अफ्रिका)”। त्यो केवल खेलकुदको एउटा आधिकारिक गीत मात्र थिएन, बल्की फुटबल इतिहासकै सबैभन्दा ठूलो सांस्कृतिक भूकम्प थियो । जसको कम्पन आज १६ वर्षपछि पनि उत्तिकै ताजा महसुस हुन्छ ।

क्यामरुनको एउटा सैनिक मार्च गीत “त्सा मिना मिना जाङ्गालेवा” बाट प्रेरित यो गीतले केवल संगीतको रेकर्ड मात्र तोडेन, यसले संघर्ष, ऊर्जा र कहिल्यै हार नमानी अगाडि बढ्ने मानवीय दृढताको नयाँ परिभाषा लेख्यो । अफ्रिकी ताल र ल्याटिन पपको त्यो दुर्लभ फ्यूजन अनि शाकिराको सिग्नेचर डान्स स्टेप यति भाइरल भयो कि संसारको जुनसुकै कुनामा बस्ने मानिस पनि अनियन्त्रित भएर झुम्न थाल्यो । जब विशाल रंगशालामा हजारौँ झण्डाहरू फर्फराइरहेका हुन्थे र शाकिराको स्वर सुरु हुन्थ्यो, तब लाग्थ्यो पूरै ब्रह्माण्ड एउटै धुनमा नाचिरहेको छ । सन् २०१० को विश्वकप स्पेनले जितेको भए पनि आज धेरैका लागि त्यो विश्वकप दुईवटा कुराका लागि मात्र चिनिन्छ, एउटा स्पेनले उचालेको सुनौलो ट्रफी र अर्को शाकिराले मच्चाएको ‘वाका वाका’ को सनसनी !