काँग्रेस एमाले सहकार्यमा फाटो, नयाँ सरकारका लागि प्रचण्ड निर्णायक !

काठमाडौं । कांग्रेस एमाले सम्बन्धमा बढ्दो असमझदारीसँगै प्रदेश सरकारहरूको सत्ता समीकरण फेरिने संकेत देखिएको छ । मधेशबाहेक अधिकांश प्रदेशमा नयाँ सरकार गठनका लागि पुष्पकमल दाहाल प्रचण्ड नेतृत्वको नेकपा निर्णायक शक्तिका रूपमा उभिएको अंकगणितले देखाएको छ ।

प्रदेश सरकारहरूमा सहकार्य गरिरहेका सत्ता साझेदार दल नेपाली काँग्रेस र नेकपा (एमाले) बीचको सम्बन्धमा खटपट सुरु भएसँगै प्रदेशको राजनीतिले नयाँ मोड लिएको छ । दुई ठूला दलबीच असमझदारी बढ्दा प्रदेशको तेस्रो ठूलो दल नेपाली कम्युनिष्ट पार्टी (नेकपा) निर्णायक अवस्थामा पुगेको छ । यस्तोमा पुष्पकमल दाहाल प्रचण्ड नेतृत्वको नेकपा सातै प्रदेशको सरकार गठन र निरन्तरतामा पुनः निर्णायक बनेको हो ।