प्रहरी, कर्मचारी र कार्गो व्यवसायीबीचको असमझदारीले अन्तर्राष्ट्रिय निर्यात व्यापार ठप्प

काठमाडौं । त्रिभुवन विमानस्थलको व्यवस्थापन, विमानस्थल भन्सार र प्रहरीबीचको असमझदारीका कारण बुधबारदेखि अन्तर्राष्ट्रिय उडानमार्फत हुने निर्यात व्यापार दुईदिनदेखि ठप्प भएको छ । समस्या समाधान नभएसम्म व्यवसायीले शुक्रबार(आज) पनि निर्यात नगर्ने अडान राखेका छन् । सरोकारवालाहरुबीच बिहीबार विहान ११ बजेदेखि ४ बजेसम्म भएको वार्ताको सहमति कार्यान्वयन हुन नसकेपछि निर्यात व्यापारले निरन्तरता पाउन नसकेको हो ।

विशेषतः प्रहरीले विमानस्थलको जाँच कक्षमा देखाएको सक्रियताले सिभिल प्रशासनको भूमिका गौण बन्दै गएको र सुरक्षाको नाममा आफूहरुलाई दुःख दिएको आरोप कार्गो व्यवसायीले लगाएका छन् । निर्यात व्यापार रोकिएकेपछि अमेरिका, युरोपलगायतका मुलुकमा पठाउनुपर्ने मालवस्तु विमानस्थल भन्सार गोदाममा थन्केको छ ।