विष्णु पौडेलको बयान: व्यवसायीबिचको कारोबारको जिम्मा मैले लिनुपर्छ भन्ने हुँदैन

काठमाडौं । पूर्व अर्थमन्त्री विष्णु पौडेलले नेपाल बिमा प्राधिकरण प्रचलित कानुनबमोजिम स्थापना भई सञ्चालन भएको स्वायत्त निकाय भएकाले अर्थमन्त्रीले उक्त प्राधिकरणलाई निर्देशन दिन मिल्ने कानुनी व्यवस्था नरहेको बताएका छन् । अदालतमा बयान दिँदै पौडेलले भने, ‘म विरुद्धको उल्लेखित उजुरीको बेहोरा सम्पूर्ण रूपमा झुटा हो।’

“उजुरीमा कुनै पनि सत्यता छैन। मलाई लगाइएका यी आरोपहरू तथ्य र प्रमाणमा आधारित छैनन्। हिमालयन रिइन्स्योरेन्स र अन्य लघु बिमाहरूको इजाजत दिने वा नदिने भन्ने अधिकार नेपाल बिमा प्राधीकरणमा निहित रहेको विषय हो। हिमालयन रिइन्स्योरेन्स र अन्य लघु बिमाहरूलाई इजाजत दिने र एपीआई पोलिसी, ब्रोकर लाइसेन्सदेखि नयाँ स्टक एक्सचेन्जसँग सम्बन्धित विषयमा मेरो कोही कसैसँग कुनै प्रकारको संलग्नता छैन” पौडेलले भने ।