कर्णाली कोरिडोरका चट्टान फोर्दै सेना

कर्णाली कोरिडोर सडक खण्डका विभिन्न स्थानमा नेपाली सेनाले कडा चट्टान फोडी सडक निर्माण गरिरहेको छ। कालीकोटको घाटाचौरदेखि बाजुराको भुक्काखोलासम्मको ११.०५ किलोमिटर चट्टानी भाग छिचोल्ने काम सेनाले गरिरहेको छ। कडा चट्टानी भीरमा ट्र्याक खोल्ने कार्यलाई नेपाली सेनाले तीव्रता दिएको छ। सो खण्डमा सेनाले चट्टान विस्फोट गर्दै मेसिन र कामदारद्वारा एकसाथ निर्माण कार्य अगाडि बढाएको छ।

सडकको ११.०५ किलोमिटर चट्टानी भागमध्ये आठ किलोमिटर ट्र्याक खन्ने कार्य सकिएको कर्णाली कोरिडोर घाटाचौर—भुक्काखोला सडक निर्माण कार्यदलका प्रमुख मेजर सुकप्रसाद थकालीले जानकारी दिए। अझै साढे तीन किलोमिटर चट्टानी भागको ट्र्याक खोल्न बाँकी रहेको उनले बताए।