सेयर लगानीकर्तालाई अर्थमन्त्री सचिवालयको अपिल : अफवाहको पछि नलाग्नुस्

काठमाडौँ । नयाँ आर्थिक वर्ष २०८३/८४ को सुरुवातसँगै आजदेखि सेयर बजारमा पुँजीगत लाभकर बढेको छ । निरन्तर घट्दै गएको सेयर बजारमा कर बढेको अवस्थामा निराशा र आक्रोश बढ्न सक्ने सम्भावनालाई मध्यनजर गर्दै अर्थमन्त्री डा.स्वर्णिम वाग्लेको सचिवालयले लगानीकर्तालाई आश्वस्त पार्ने प्रयास गरेको छ ।

सेयर बजारका लगानीकर्तालाई सम्बोधन गर्दै सचिवालयले बजारमा चलाइएका भ्रामक हल्ला र अफवाहको पछि नलाग्न आग्रह गरेको छ । सरकार बनेयता सेयर बजार नकारात्मक बनेको र सम्पत्तिको आकार घट्दा लगानीकर्तामा देखिएको आक्रोशलाई सरकारले स्वाभाविक रूपमा लिएको विज्ञप्तिमा उल्लेख छ ।