प्रधानमन्त्री कार्यालय र परराष्ट्र मन्त्रालयबिच बढ्यो दुरी

काठमाडौँ । परराष्ट्र मन्त्रालयले १३ जना राजदूत नियुक्तिका लागि प्रधानमन्त्री कार्यालयमा नाम पठाए पनि हालसम्म नियुक्ति हुन सकेको छैन । केही समय अघि मन्त्रालयले परराष्ट्रका कर्मचारीमध्येबाट नियुक्त गर्नुपर्ने राजदूतको नाम पनि प्रधानमन्त्री कार्यालयमा पठाएको थियो । उनीहरूलाई पनि अहिलेसम्म नियुक्ति दिइएको छैन ।

परराष्ट्र मन्त्रालयका एक अधिकारीका अनुसार मन्त्रालयबाट फटाफट नाम पठाए पनि प्रधानमन्त्री कार्यालयबाट प्रक्रिया अगाडि नबढाएको कारण राजदूत नियुक्तिमा ढिलाइ भइरहेको छ । विभिन्न मुलुकमा राजदूत नहुँदा कूटनीतिक सम्बन्ध सुधार आउन नसकेको भन्दै ती अधिकारीले प्रधानमन्त्री कार्यालयबाट परराष्ट्रलाई असहयोग भइरहेको अनुभूति हुन थालेको बताए ।