साउन सुरु भएसँगै इन्द्रचोकको पोते बजारमा चहलपहल, तस्बिरहरू

काठमाडौँ । साउन महिना सुरु भएसँगै काठमाडौँको इन्द्रचोकमा रहेको पोते बजारमा चहलपहल निकै बढ्न थालेको छ । वर्षकै पवित्र महिना मानिने साउनमा विशेष गरी महिलाहरू हरिया र पहेँला चुरा तथा पोतेको किनमेल गर्न इन्द्रचोक र असन क्षेत्रका पसलहरूमा पुग्न थालेका छन् ।

हिन्दु धार्मिक विश्वासअनुसार साउन महिना भगवान् शिवको आराधना गर्ने विशेष समय हो । यस महिनाभरि महिलाहरूले हरियो, रातो र पहेँलो पोते तथा चुरा लगाउने गर्छन् । साउन महिनामा प्रकृति पनि हरियाली हुने र यस समयमा हरियो पहिरन तथा चुरापोते लगाउँदा सुख, शान्ति र सौभाग्य प्राप्ति हुने विश्वास रहिआएको छ ।