सामाजिक अभियन्ता तुलसीराम पाण्डे एनआरएनए आईसीसी सदस्यमा मनोनीत

काठमाडौं– गैरआवासीय नेपाली संघ (एनआरएनए) ले एकता महाधिवेशनपछिको संगठनलाई पूर्णता दिने क्रममा अन्तर्राष्ट्रिय समन्वय परिषद् (आईसीसी) सहित विभिन्न पदाधिकारी, केन्द्रीय सदस्य र सल्लाहकारहरूको मनोनयन गरेको छ । संघको संशोधित विधानअनुसार ५१ सदस्यीय आईसीसी गठन गरिएको छ, जसअन्तर्गत कतारबाट सामाजिक अभियन्ता तुलसीराम पाण्डे र युवराज शर्मा आईसीसी सदस्यमा मनोनीत भएका छन् ।

कतारमा करिब दुई दशकदेखि नेपाली समुदायको हकहित, सामाजिक सेवा र मानवीय सहयोगमा निरन्तर सक्रिय रहँदै आएका पाण्डेको मनोनयनलाई प्रवासी नेपाली समुदायले सकारात्मक रूपमा लिएको छ । सामाजिक उत्तरदायित्वलाई व्यक्तिगत स्वार्थभन्दा माथि राखेर समुदायका लागि निरन्तर योगदान दिँदै आएका पाण्डे कतारमा परिचित सामाजिक अभियन्ताका रूपमा चिनिन्छन् ।