रसुवाको बाढीमा रौतहटका ६ जना सम्पर्कविहीन

रौतहट । रसुवामा आएको बाढी तथा पहिरोपछि रौतहटका ६ जना सम्पर्कविहीन भएका छन्। जिल्ला प्रशासन कार्यालय रौतहटले सार्वजनिक गरेको सम्पर्कविहीन व्यक्तिहरूको विवरणमा रौतहटका विभिन्न स्थानीय तहका ६ जना सम्पर्क विहीन रहेको उल्लेख छ।

सम्पर्कविहीन हुनेमा गरुडा नगरपालिका–३ का ३४ वर्षीय सुधीर कुमार साह रहेका छन्। उनी अपर त्रिशूली–१ जलविद्युत् आयोजनामा मेकानिकल इन्जिनियरका रूपमा कार्यरत थिए। त्यसैगरी वृन्दावन नगरपालिका–९ का ३४ वर्षीय गौरव राउत पनि सोही आयोजनामा मेकानिकल इन्जिनियरका रूपमा कार्यरत रहेको र बाढीपछि सम्पर्कविहीन भएको जनाइएको छ।