भारत भ्रमणमा रविको राजनीतिक दौडधुप, भारतीय विदेशमन्त्री र भाजपाका अध्यक्षसँग भेटवार्ता

काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले भारत भ्रमणका क्रममा भारतीय विदेशमन्त्री एस जयशंकर तथा भारतीय जनता पार्टी (भाजपा) का राष्ट्रिय अध्यक्ष नितिन नवीनसँग छुट्टाछुट्टै भेटवार्ता गरेका छन्। भेटमा नेपाल–भारत सम्बन्ध, विकास साझेदारी, जनस्तरको सम्बन्ध तथा राजनीतिमा युवा पुस्ताको बढ्दो भूमिकाबारे छलफल भएको जनाइएको छ।

भारतको राजधानी नयाँ दिल्लीमा भएको भेटपछि भारतीय विदेशमन्त्री जयशंकरले सामाजिक सञ्जालमार्फत रास्वपा सभापति लामिछाने र उनको प्रतिनिधिमण्डलसँग भेट गर्न पाएकोमा खुसी व्यक्त गरेका छन्। उनले नेपाल-भारत विकास साझेदारी र दुई देशबीचको जनस्तरको सम्बन्धले साझा विकास र समृद्धिलाई प्रवर्द्धन गर्न महत्वपूर्ण भूमिका खेल्ने उल्लेख गरेका छन्।