साफ महिला च्याम्पियनसिप: सातौं पटक फाइनल पुग्दै उपाधि जित्ने लक्ष्यमा नेपाल

उपविजेतामा ६ पल्ट सीमित नेपाली राष्ट्रिय महिला फुटबल टोली भारतमा जारी साफ महिला च्याम्पियनसिपको आठौं संस्करणको फाइनलमा पुग्दै पहिलोपल्ट उपाधि जित्ने लक्ष्य कायमै राख्न चाहन्छ ।

सन् २०१० देखि सुरु भएको महिला साफ च्याम्पियनसिपमा पछिल्ला सात संस्करणमध्ये नेपालले छैटौंपल्ट उपाधिका लागि प्रतिस्पर्धा गरेको छ । तर, फाइनल प्रतिस्पर्धामा नेपाल सदैव असफल हुँदै आएको छ । उपाधिविहीन भए पनि दक्षिण एसियाली महिला फुटबलमा नेपाली टोलीलाई सदैव दाबेदारमध्ये एकका रूपमा हेरिने गरेको छ । नेपाली टोलीले पनि उपाधिका लागि चुनौती दिँदै आएको छ । यसपल्ट नेपालसँग स्टार स्ट्राइकर सावित्रा भण्डारी र सविता रानामगरजस्ता फरवार्ड छैनन् । महत्त्वपूर्ण मिडफिल्डर प्रीति राईले पनि समूहचरणका खेल खेलिनन् । भारतमा औसत प्रदर्शन गरे पनि नेपाली टोली उपाधि जित्ने धोको पूरा गर्ने लक्ष्यमा छ । तर, त्यसका लागि बुधबार नेपालले सेमिफाइनलमा दुईपल्टको च्याम्पियन बंगलादेशको चुनौती पार गर्नुपर्नेछ ।