‘मास्टर्नी’ विवाद : चलचित्र निर्माता र गायकले मागे माफी, हटाए विवादित गीत

आगामी भदौ ५ गतेबाट प्रदर्शनमा आउन लागेको नेपाली चलचित्र ‘मास्टर्नी’ को एउटा प्रमोशनल (‘म्याथसिक्ने’) गीत विवादमा परेपछि निर्माण पक्ष र गायकले माफी मागेका छन्।

शिक्षक समुदायको मानमर्दन हुने गरी शब्द प्रयोग गरिएको भन्दै नेपाल शिक्षक महासंघ र महिला शिक्षक समाजले आपत्ति जनाएपछि यस्तो कदम चालिएको हो। विवाद बढेपछि चलचित्रको निर्माण संस्था आयंका फिल्म्स प्रालिका तर्फबाट अध्यक्ष प्रियंका कार्कीले एक प्रेस विज्ञप्ति जारी गर्दै माफी मागेकी छिन्। उनले भनकी छिन्, ‘गीत चलचित्रको प्रचारप्रसारका लागि मात्र प्रयोग गरिएको थियो, शिक्षक समुदाय वा शिक्षण पेसाप्रति अपमान गर्ने उद्देश्य हाम्रो थिएन।’ उनले चलचित्रको मूल कथावस्तुसँग उक्त गीतको कुनै सम्बन्ध नरहेको स्पष्ट पार्दै विवादित गीत हटाइसकेको जानकारी दिइन्।