मुसिकोट नगरपालिकाबाट नापी तथा भूमि प्रशासन सेवा सञ्चालन

२ साउन, गुल्मी । गुल्मीको मुसिकोट नगरपालिकाको प्रशासनिक भवनबाट नापी तथा भूमि प्रशासन सेवा औपचारिक रूपमा सञ्चालनमा आएको छ । सेवाको शुभारम्भका अवसरमा शुक्रबार नगरप्रमुख जीवन खरेलले नक्सा प्रिन्ट गरी सेवाको शुभारम्भ गरेका हुन् ।

सेवा सञ्चालनसँगै अब मुसिकोट नगरपालिकाका नागरिकले नापी तथा भूमि प्रशासनसम्बन्धी अधिकांश सेवाका लागि मजुवा वा तम्घास धाउनुपर्ने बाध्यता कम हुने भएको छ । जग्गा नापजाँच, नक्सा, स्रेस्ता लगायत भूमि प्रशासनसँग सम्बन्धित सेवा स्थानीय तहबाटै उपलब्ध गराउने उद्देश्यले सेवा सञ्चालन गरिएको नगरपालिकाले जनाएको छ ।