१०४ दिनदेखि आन्दोलनमा इन्टर्न चिकित्सक, ‘समान कामको समान स्टाइपेन्ड’ अझै अन्योलमा

काठमाडौं- समान प्रवेश परीक्षा उत्तीर्ण गर्ने, एउटै पाठ्यक्रम अध्ययन गर्ने र अस्पतालमा समान जिम्मेवारी निर्वाह गर्ने एमबीबीएस तथा बीडीएस इन्टर्न चिकित्सकहरू आज पनि सरकारी र निजी मेडिकल कलेजमा फरक-फरक स्टाइपेन्डमा काम गर्न बाध्य छन् ।

यही असमानताको अन्त्यको माग गर्दै प्रारम्भ गरिएको ‘एमबीबीएस तथा बीडीएस इन्टर्न स्टाइपेन्ड एकरूपता अभियान’ ले १०४ दिन पूरा गरेको छ । आन्दोलनका क्रममा सरकारसँग पटक–पटक संवाद, मन्त्रालयस्तरीय पत्राचार, अध्ययन समिति गठन र प्रतिवेदन तयार भए पनि अन्तिम नीतिगत निर्णय भने अझै हुन सकेको छैन । आन्दोलनरत इन्टर्न चिकित्सकहरूका अनुसार उनीहरूको आन्दोलन कुनै नयाँ सुविधा थप्नका लागि होइन, विगत करिब एक दशकदेखि कायम रहेको स्टाइपेन्ड विभेद अन्त्य गरी समान कामको समान पारिश्रमिक सुनिश्चित गराउनका लागि हो ।