ह्वाट्सएपमा उपहारको पासोः संखुवासभाकी महिलाले १८ लाख गुमाइन्, नाली सफा गर्ने मजदुर हिरासतमा

काठमाडौं । ह्वाट्सएपमा एउटा सामान्य मेसेज आयो- 'हेलो' ! त्यसपछि बेलायतबाट सुनका गहना, आईफोन र बहुमूल्य उपहार पठाइदिएको भन्दै नक्कली तस्बिर । संखुवासभाकी शर्मिला अधिकारी (नाम परिवर्तन) लाई त्यसले यसरी भ्रममा पार्‍यो कि, उनले आफ्नो वर्षौंदेखिको मिहिनेतको झन्डै १९ लाख रुपैयाँ गुमाउनु पर्‍यो । तर, यो अनलाइन ठगी काण्डको भित्री पाटो खोतल्दै जाँदा कथा शर्मिलाको आर्थिक क्षतिमा मात्र सीमित छैन ।

संखुवासभा जिल्ला अदालतमा सरकारी वकिल कार्यालयले दायर गरेको अभियोग-पत्रले नेपालमा तीव्र रूपमा फैलिरहेको साइबर अपराधको एउटा यस्तो डरलाग्दो तस्बिर उजागर गरेको छ, जहाँ अन्तर्राष्ट्रिय गिरोहले नेपालका दुरदराजका विपन्न र श्रमजीवी नागरिकहरूलाई 'मनी म्युल' (बैंक खाता भाडामा दिने माध्यम) का रूपमा प्रयोग गरिरहेका छन् ।