कर्णालीमा सत्ता फेरबदल : नेकपाभित्रै पनि ‘असन्तुष्टि’

वीरेन्द्रनगर : कर्णाली प्रदेश सरकारमा नेपाली कांग्रेससँग मिलेर जाने विषयमा नेपाली कम्युनिष्ट पार्टी (नेकपा) भित्रको असन्तुष्टि पनि सतहमा आएको छ । नेकपा (एमाले) बाट मुख्यमन्त्री भएका यामलाल कँडेलविरुद्ध नेपाली कांग्रेससँगको सहकार्यमा अविश्वासको प्रस्ताव दर्ता गरी नेपाली कांग्रेससँग मिलेर सरकारमा जाने तयारी गरेपछि नेपाली कम्युनिष्ट पार्टीमा पनि असन्तुष्टि देखिएको हो ।

नेपाली कम्युनिष्ट पार्टीका बरिष्ठ नेता नारायणकाजी श्रेष्ठले पार्टीले सत्ता परिवर्तनको खेलमा नलाग्ने स्पष्ट निर्णय गरिसकेको भन्दै आफूहरु सत्ता परिवर्तनको खेलमा नलाग्ने बताए । उनले सामाजिक सञ्जालमा लेखेका छन्, ‘एक वर्षपछि नियमित हुने निर्वाचनमा सत्ता परिवर्तनको खेलमा सामेल हुनु भनेको दुःखद हो ।’