लिङ्देन र राणाको टकराबमा दुर्गा प्रसाईंको ‘इन्ट्री’ले राप्रपालाई कति पुग्ला क्षति ?

राष्ट्रिय प्रजातन्त्र पार्टी (राप्रपा) लाई नयाँपुस्तामा लैजाने अभियानमा सक्रिय थिए, धवलशमशेर राणा । मंसिर २०७८ मा सम्पन्न राप्रपाको महाधिवेशनअघि राणाको सक्रियताले पार्टीभित्र तरंग मात्र ल्याएन, साँच्चिकै परिवर्तन भयो । अनि, मंसिर २०७८ को महाधिवेशनमा राप्रपाको अध्यक्षमा निर्वाचित भए राजेन्द्र लिङ्देन । राणा महामन्त्रीमा निर्वाचित भए । राप्रपाजस्तो परम्परागत दलमा नयाँपुस्ताबाट सिधै लिङ्देन निर्वाचित हुनु अस्वाभाविक नै थियो । त्यसमाथि कमल थापाजस्तो ‘भेट्रान नेता’लाई पराजित गरेर । त्यसैले राप्रपाको राजनीतिमा यो निकै ठूलो ‘प्याराडाइम सिफ्ट’ थियो । जसको गतिलो सन्देश २०७९ को चुनावमा पनि गयो । ठूलो शक्तिको रूपमा उदायो राप्रपा ।

त्यतिबेला पूर्वराजा ज्ञानेन्द्र शाहले निर्मलनिवासबाट पनि राप्रपाको नेतृत्व परिवर्तन चाहेका थिए । त्यसकारण कमल थापाको विकल्पमा उभिएका राजेन्द्र लिङ्देनलाई साथ दिए । त्यसका लागि वातावरण बनाउने भूमिकामा राणा नै सक्रिय थिए । थापाले सार्वजनिक रूपमै निर्मलनिवास हराउन लागेको भन्दै आलोचना गरेका थिए ।