नेपालमा बढ्दो 'लु' को जोखिम: तापक्रम वृद्धिका पुराना रेकर्ड तोडिँदै

काठमाडौँ । जलवायु परिवर्तनले निम्त्याएको बढ्दो गर्मी र तातो हावा (लु) को प्रकोपलाई कम गर्न पूर्वसूचना प्रणालीलाई प्रभावकारी बनाउँदै ‘हिट एक्शन प्लान’ (तापलहर कार्ययोजना) को कार्यान्वयनलाई थप सुदृढ बनाउनुपर्नेमा सरोकारवालाहरूले विशेष जोड दिएका छन्। ‘हिट एक्शन डे’ को अवसरमा राजधानीमा आयोजित एक विशेष कार्यक्रममा बोल्दै विज्ञ तथा सरकारी अधिकारीहरूले यस्तो धारणा राखेका हुन्। नेपालमा समेत तापलहरको जोखिम तीव्र रूपमा बढ्दै गएकोप्रति चिन्ता व्यक्त गर्दै उनीहरूले यसको न्यूनीकरणका लागि सरकार र साझेदार संस्थाहरूबीच बलियो सहकार्य आवश्यक रहेको बताए।

कार्यक्रममा नेपाल रेडक्रस सोसाइटीका महासचिव मीनबहादुर मल्लले तराईका अधिकांश जिल्लाहरू तातो हावाको उच्च जोखिममा रहेको उल्लेख गरे। हाल अमेरिकी रेडक्रसको सहयोगमा बाँके र रुपन्देही जिल्लामा समुदायलाई लूबाट जोगाउने उपायबारे सचेतना तथा पूर्वतयारी अभियान सञ्चालन भइरहेको जानकारी दिँदै उनले यी दुई जिल्ला मात्र नभई तराईका धेरै क्षेत्र प्रभावित भइरहेकाले सरकारको रणनीतिक सहयोग आवश्यक रहेको बताए। जलवायु परिवर्तनको यो चुनौती सामना गर्न सरकारी निकाय र विकास साझेदारबीच समन्वय अपरिहार्य भएको उनको भनाइ थियो।