परम्परागत तरिका असफल भइरहेका बेलामा नेपाली अनुसन्धानकर्ताले ल्याए एआईबाट बाँदर भगाउने समाधान

काठमाडौं । बाँदर धपाउने परम्परागत तरिका असफल भइरहेको बेलामा नेपाली अनुसन्धानकर्ताको टोलीले एआईमा आधारित भएर बाँदर धपाउने समाधान अघि सारेका छन् । एडभान्स्ड कलेज अफ इन्जिनियरिङ एन्ड म्यानेजमेन्ट (एसीईएम) अन्तर्गतको सेन्टर फर एकेडेमिया-इन्डस्ट्री लिङ्केज एन्ड इन्टरनेसनल कोल्याबोरेसन (कैलिक) र विज्ञहरूको टोलीले उक्त समाधान ल्याएको हो ।

‘मङ्की कन्ट्रोल एन्ड ड्यामेज मिटिगेसन आर एन्ड डी प्रोजेक्ट’ नाम दिइएको यो परियोजनाले जमिन र आकाशमा गरी दुई किसिमबाट बाँदर धपाउने समाधान प्रस्तुत गरेको छ । परियोजनाका मुख्य योजनाकार एवम् कैलिकका संस्थापक डा. शङ्कर ढकालका अनुसार यस प्रणालीमा जडान गरिएका क्यामेरा र सेन्सरहरूले एआई र इमेज प्रोसेसिङको प्रयोग गरी बाँदर आएको तत्कालै पत्ता लगाउँछन् र फरक फरक प्रविधिको प्रयोग गरेर बाँदर धपाउँछन् ।